英格兰联赛盃4强次回合，车路士主场再斗热刺，热刺首回合虽然领先1比0，但今场要残阵作客，「4大天王」哈利卡尼同迪利阿里受伤缺阵，孙兴民出战亚洲盃未归队，只系得番基斯甸艾历臣撑住，实力降晒呢，加上热刺近5次作客「蓝桥」仅得1胜1和3负，车路士仲唔趁机发难翻盘，主胜有1.56倍咪错过。（周五凌晨3时45分开赛）
今季热刺喺联赛加盃赛合共射入72球，当中哈利卡尼20球、孙兴民12球、迪利阿里亦有7球，3人合共射39球，佔左热刺入波超过一半，依家3人同时缺阵，话影响唔大嗰个都唉你，淨系睇上场英超对富咸赛后访问，热刺领队普捷天奴讲迪利阿里伤势时愁眉苦脸个样，你就知有几大镬。
今季主场砌Big 6有计
热刺正选中前场球员个个都拥有一线实力，但班替补就唔同讲法，洛兰迪、拉美拿只能够讲系二线球员，今季为热刺入过8球嘅巴西中场卢卡斯莫拉亦膝头受伤未知踢唔踢得，今场普捷天奴只能够打防反，弊在呢样并唔系热刺最耍家嘅踢法，随时自乱阵脚。
车路士首回合作客输0比1，想翻盘打入决赛今场非胜不可，一众主力包括夏萨特、佐真奴费路、尼高路简迪等喺首回合皆正选上阵，为收复失地，今场肯定强阵出击。车仔上场联赛作客虽不敌阿仙奴0比2，但回师主场又系另一回事，皆因车仔今季4次迎战Big 6球队保持不败，而且4场车仔都系先开纪录嗰队，加上主场斗热刺往绩靓，主胜必捧。