英超:前4關鍵戰穩陣為上 阿仙奴遇狼捱細界
时间：2022-02-11 11:17 来源：足球图库
今晚英超快車有場爭前4關鍵戰，狼隊主場硬撼阿仙奴。「6哥」阿仙奴踏入2022年後5戰未贏過，前線表現跌Watt乃主因，狼隊防守一向固若金湯，今遇爭前4勁旅一定穩打穩紮，2.5球入球細乃不二之選。（Now 622周五凌晨3時45分直播）
阿仙奴來到2022年好似撞邪咁，自今年首仗反輸畀曼城1比2，就開始行衰運，之後4仗只得2和2負，包括喺英聯盃及英足盃，接連被利物浦及英冠仔諾定咸森林踢出局，上仗聯賽又同般尼互交白卷，呢4仗竟然1球都入唔到，全開2球或以下，狀態下滑。
兵工廠前線死晒火
阿仙奴於早前冬窗「有出冇入」，包括送走失寵射手奧巴美揚，又未能簽入具分量前鋒，箭頭拿卡錫迪主要做串連，把握力差為人詬病，單計聯賽今季只入3球，而小將加比爾馬天尼利、布卡約沙卡、伊美路維等集體失靈，難怪前線熄晒火。
啱啱喺英足盃出局嘅狼隊，向來守強於攻，雖然21仗聯賽入得19粒，但僅失16球，係英超失波第2少球隊，僅次於榜首曼城，佢哋面對攻力超強嘅曼城同利物浦，都係輸0比1，更喺主場成功守和車仔0比0，要攻破呢道銅牆鐵壁絕非易事。查實阿仙奴與狼隊，落後「4哥」韋斯咸4分及6分，但同樣打少3仗，呢場爭前4嘅「6分波」必穩陣行先，入球細不容錯過。
