4强梦幻星战
美洲国家盃周三早上爆发4强激战，东道主巴西火併宿敌阿根廷。呢场虽然係大家期待已久嘅梦幻对决及冠军前哨战，不过睇番今届4场8强竟然有3场开出0比0，便知嚟到淘汰赛始终都係防守当道，更何况，双方近5次交手有4次总入球开2球或以下，高手过招相信入波唔会多，波童推介2.5球入球细。（Now 650及Now E周三早上8时30分直播）
主办国巴西今届赛前有尼马因伤退队，虽然菲腊比古天奴、罗拔图法明奴及艾华顿索拉斯等锋将发挥唔错，不过上场对住一心死守嘅巴拉圭又死火，最终要靠互射12码胜出晋级，水准唔算太稳定，由于早前于热身赛有好表现嘅爱华顿前锋李察利臣上场赛前染病已退队，令到前线变阵本钱更少。好彩巴西今届后防表现出现，连续4场比赛都冇失波，既然现时球队欠缺破关板斧，来到4强相信会踢得更加谨慎。
阿根廷今届分组赛表现慢热，好彩去到8强终于踢出强者本色，凭拿达路马天尼斯及卢施素入波以2比0击败委内瑞拉，亦係8强唯一一支可以喺法定时间之内入波兼获胜嘅球队。马天尼斯连续2场有波入，应可进一步确立正选席位，而且后防经过连续4场起用唔同配搭后，以呢场表现最能畀到球迷稳健信心，当中效力热刺嘅祖安科夫连续2场担正，阿根廷都能保持不失球赢波，相信呢位21岁小将可以填补奥达文迪年纪渐大、速度较慢嘅不足。
近5次碰头4场开细
巴西、阿根廷作为南美足球两大龙头，每次交锋都话题性十足，不过由于2军近年成绩未算突出，加上尼马、美斯等巨星代表国家队亦欠缺佳作，故此近年交锋甚少出现大手交易，近5次碰头就有4次总入球开2球或以下，而且今届美洲盃4场8强同样全开2球或以下，当中3场更踢成0比0，相信今场会延续入波偏少嘅走势，一于再追入球细。