沙拿热够身嚟料
周三盃赛做主打，阿King重心放喺非国盃A组次轮赛事，东道主埃及硬撼刚果民主共和国。埃及顺利旗开得胜，王牌穆罕默德沙拿经过首轮热身后，预计会逐渐上力；刚果民主共和国为争出线要焗攻，随时益晒擅打反击嘅埃及，让球盘埃及让一球，照捧上盘。
（myTV Gold 302及now 639周四凌晨4时直播）
东道主埃及虽然喺首轮压住对手嚟砌，但只凭马莫特查斯古特一箭定江山，以1比0小胜津巴布韦，王牌穆罕默德沙拿更连番失机，但阿King觉得沙拿表现唔差，而且对手门将「上晒身」嘅神勇演出，亦成为呢位利物浦前锋交白卷原因，但经过呢场热身之后，相信沙拿今仗会嚟料。相反，刚果民主共和国首轮淨吞乌干达两蛋，尤其係3位外流欧洲嘅鲁尔迪玛、泰沙兰及马素阿古，表现差强人意，为出线今仗要焗攻，只会益晒反击锐利嘅埃及。加上双方近5次交锋，埃及取得4胜1和压倒性优势，明显格食格，让球盘埃及让一球都冇有怕，上盘捧得过。
乌干达追击津巴布韦
同组嘅乌干达对津巴布韦，乌干达首轮赢刚果民主共和国2比0，若非前锋卡杜不断「嘥料」，应该唔只赢两粒，亦反映出佢哋上仗佔尽上风。津巴布韦首轮输畀埃及之役，全程捱打，只输1粒坚係好彩，不过撞正态勇嘅乌干达难有运行，主胜有计。
（myTV Gold 301及now 638周四凌晨1时直播）
另外，B组次轮赛事，尼日利亚火併畿内亚，「超霸鹰」首轮小胜布隆迪1比0，喺中超搵食嘅箭头恩哈路后备入替冇耐即建奇功，呢位前屈福特射手近6次为国披甲轰8粒，脚风超顺，遇上首轮被弱旅马达加斯加逼和嘅畿内亚，有力再下一城。
（myTV Gold 301及now 638周三晚10时30分直播）