只求衞冕无谓炒西班牙
女子世界盃16强，西班牙女足挑战上届冠军美国女足。美国女足分组赛表现充满霸气，3战全胜入18球0失球，不过作为衞冕球队，最重要是懂得留放，美国女足大赛经验丰富，上届去到淘汰赛之后，4场比赛有3场总入球2球或以下，目标为本，今场亦可能收够筹就算，宁捧入球细。
（有线603及604台周二凌晨零时直播）
美国女足入咗18球，打破世盃分组赛最高入球纪录，星级球员雅历丝摩根首战入5粒，不过其后两场分组赛就冇波入，仲喺最后一场对瑞典时受伤，下半场踢咗1分钟就被迫要换走，开头未知係咪触伤右膝旧患。佢喺赛后立即Call晒班随团记者，表示自己冇事，领队艾莉丝亦派心丸，话咁做係为咗今场雅历丝摩根可以上阵，先至咁谨慎。
其实艾莉丝咁做，唔多唔少亦反映出，美国女足嚟紧将会目标为本，只要赢波就得，唔会要球员冒险，睇番上届佢哋淘汰赛，除咗决赛冇晒后顾之忧大炒日本5比2，之前3场由16强至准决赛，都係赢对方一粒起两粒止。今届其实情况好相同，首战大炒泰国13比0后，跟住係赢智利3比0同2比0击败瑞典，愈赢愈少，始终短时间要应付咁多场波，如果佢哋以冠军为目标，就一定唔会咁快放到咁尽。
西班牙女足分组赛1胜1和1负，有2场入唔到波，进攻能力肯定不及美国女足，相信今场都唔会与美国女足斗攻，只会做好防守，减少失球，希望可以有奇迹出现，所以今场应该唔会太多波入。
瑞典往绩唔赦加拿大
另一场瑞典女足对加拿大女足，瑞典喺分组赛屈居美国之后，但表现唔算差，加拿大女足世界排名虽然高过瑞典，不过论世盃决赛周经验以瑞典秤先，而且对上4次交手，瑞典只输过一次，今场有得受让，当然係捧下盘啦。
（周二凌晨3时开赛）