东瀛双箭伤退蚀章
周二晚世青盃16强激战连场，等阿King同大家讲吓过关心水。其中日本U20将会同南韩U20上演东亚打吡，「小武士」多位前场主力上仗伤出提早离队，严重影响日本攻力，相反南韩中场李康仁表现够抢镜，有力带领球队赢波过关，捧受让嘅南韩U20让球客胜。
（有线601及661台周二晚11时30分直播）
上届世青盃南韩作为东道主，面对葡萄牙以1比3输波16强止步，今届捲土重来肯定希望取得突破，于是唔少球迷就将赢波希望寄托喺李康仁身上。呢为年仅18岁嘅天才中场，细细个就畀西甲豪门球队华伦西亚相中，已经喺「蝙蝠军团」青训浸淫多年，今季仲多次被调上1队献技，绝对係对佢实力嘅肯定。上仗面对强敌阿根廷U20，李康仁就交出关键助攻，帮助南韩U20以2比1击败对手，嚟紧比赛嘅表现值得期待。
相反日本上仗硬撼意大利一战，有田川亨介同齐藤光毅两位主力攻击手伤出，两人仲已经提前离队无缘馀下赛事，球队攻力势必大受打击，预计今场面对球风硬朗嘅南韩难有作为，宁愿捧番南韩U20让球客胜好过。
法国U20可挫美军
同时开波嘅仲有法国U20面对美国U20，贵为今届夺标大热，法国分组赛表现冇令人失望，3战赢晒兼只失过2球，要应付实力一般嘅美国U20绝对绰绰有馀，一于捧主胜。而阿根廷U20将会同马里U20争夺另一个8强席位，马里U20今届入得又失得，明显攻强守弱，今场就算面对强敌，阿根廷U20都应该会继续斗攻，吼实入球大实冇错。