和波攞1分即首名出线
喺波兰举行嘅世青盃已打紧分组赛尾轮，今晚直播戏码就有C组嘅新西兰U20硬撼乌拉圭U20。两队同得6分肯定出线，今仗只属名次之争，乌拉圭係世青盃常客，既已晋级随时留力，新西兰今届一鸣惊人，为保持不失实玩死守博首名出线，入球细更值得捧场。
（有线661及601台周五凌晨零时直播）
双方同样于C组头两轮分组赛赢晒，各得6分肯定出线，新西兰凭较佳得失球暂居榜首。老实讲，乌拉圭实力点都秤先啲，但呢支喺近3届世青盃两入4强嘅南美劲旅，已经熟晒此盃赛嘅玩法，依家又未知首名或次名出线后会对乜嘢对手，与其今仗搏甩髀，倒不如留力16强好过，今仗或出副选交差。
新西兰今届异军突起，首仗狂数洪都拉斯5粒，上仗又赢挪威两球，表现令人刮目相看，心雄之下想争首名出线威威唔奇。值得一提嘅，係新军在头两轮保持零失球，守得两嘴，面对劲敌乌拉圭，一定唔敢轻举妄动，随时摆铁桶阵玩死守，似乎细盘更可取。
美国求晋级炒起卡塔尔
至于D组嘅美国U20对卡塔尔U20，首仗落笔打三更嘅「花旗国」，上仗靠前锋施巴斯坦苏图省两粒，赢尼日利亚2比0打开胜利之门，今仗面对同组最弱、头两场输晒兼冇波入嘅卡塔尔，有力大胜争出线，直取让球主胜。（周五凌晨2时30分开赛）