博炒沙利Vs欧霸王艾美利
今晚喺阿塞拜疆上演欧霸盃王者之战，由英超伦敦双雄车路士与阿仙奴争逐冠军。车仔虽有欧霸盃射手榜「1哥」基奥特倒戈旧东家，但伤兵成箩，领队沙利又博炒影响军心，相反阿仙奴为抢下届欧联入场券，战意更坚，主帅艾美利若果今次再赢，就会荣膺「欧霸盃之王」，加上近年交手甚少于法定时间输波，阿仙奴仲有得受让咁笋，让球客胜咪错过。
（myTV Gold 303、Now 643、有线656及616台周四凌晨3时直播）
车仔曾喺2013年捧过欧霸盃，今届又大部分时间派副选出战，但14场法定时间内仍取得11胜3和不败佳绩，箭头基奥特更以10球位居射手榜榜首。睇落车仔顺风顺水，但查实其晋级路途上，除咗4强对手法兰克福稍强外，其馀皆为欧洲二线球队，而对法福两回合法定时间都打和，要靠互射12码先杀入决赛，呢个表面睇嘅「靓绩」信唔过。
车路士阵容天残地缺
除此之外，新星赫臣奥杜尔及罗夫度斯卓克提早收咧、守将鲁迪格亦有伤在身，阵容可谓天残地缺。最衰係领队沙利火上加油，有指佢同祖云达斯达成协议，下季会转教呢支意甲班霸，但因佢同车仔仍有合约在身，近日批评球队以今场捧盃与否定其去留，嬲到想噼炮唔捞，似係博炒，令军心不稳。
连续2届无缘欧联嘅阿仙奴，今季联赛只获第5位，若果想取得下届欧联入场券，唯一办法係捧欧霸盃。好彩主帅艾美利一向有欧霸盃专家美誉，与车仔相比，佢哋今届于淘汰赛踢拿玻里、华伦西亚等劲旅出局，更有说服力，而且艾帅在2013至16年执教西维尔期间，连续3届领军入决赛兼捧盃坚劲，如果今次再封王，佢就会力压意大利白头佬查帕东尼，成为捧走欧霸盃（连同前身欧洲足协盃）次数最多领队，真係可以改名做「艾美利盃」。
阿仙奴近8对赛仅1败
今场係老门神施治挂靴前最后一战，而中场米希达利恩受政治因素影响未能披甲，必定激起众将为两人而战嘅斗心，射手奥巴美扬于今季各项赛事有30球进帐，包括喺欧霸盃轰8球，伙拍拿卡锡迪不容小觑。再睇睇双方近8次正面交锋，阿仙奴喺法定时间取得2胜5和仅1败，仲获受让首选让球客胜，不妨捧埋佢哋有2.1倍嘅「冠军」。