新人辈出势劏阿根廷
周三凌晨世青盃分组赛，F组葡萄牙U20硬撼阿根廷U20。葡萄牙今届阵容人才济济，小组首战亦成功击败南韩，呢场面对后防唔算稳阵嘅阿根廷，一班攻击好手随时再有机会发围，平手盘捧葡萄牙U20。
（有线601及661台周三凌晨零时直播）
葡萄牙U20今届以宾菲加、波图和士砵亭等国内豪门嘅年青球员为骨干，虽然最为人熟悉嘅「新C朗」祖奥菲历斯，已经被提拔做大国脚无缘今届赛事，不过佢啲队友来头绝对唔嘢少。其中谢特臣费南迪斯今届喺宾菲加上位担正，带领球队联赛封王兼喺欧霸盃杀入8强，绝对係葡萄牙U20中场核心，加上分别效力狼队同曼联嘅维拿基同达洛治都已经喺英超崭露头角，整体质素有保证。相反千禧年前后多次称霸世青盃嘅阿根廷，近几届世青盃表现明显下滑，首战面对弱旅南非U20虽然大胜而回，不过后防风声鹤唳唔算稳阵，先后2次遭对手偷袭得手，呢场面对超班嘅葡萄牙U20随时陷入苦战，平手盘宁愿捧葡萄牙U20好过。
南韩法国可分途报捷
同组南非U20对南韩U20，南非U20首战惨败，仲有入波嘅守将基南菲腊斯攞红牌呢场要坐波监，对住有华伦西亚小将李康仁领军嘅南韩U20，随时再输，吼客胜。另外E组有巴拿马U20斗夺标大热法国U20，后者首战靠里昂新仔高尔尼大爆发，以2比0轻鬆击败沙特阿拉伯U20，呢场面对同属鱼腩部队嘅巴拿马U20，一班「高卢鷄」新星热好身有望乘势追击大炒对手，让球客胜值博。