意甲煞科日
今晚意甲煞科日，焦点落喺前4之争，阿特兰大、国际米兰、AC米兰及罗马去争逐馀下2张下届欧联入场券，彼此之间只差3分，为名为利一定争崩头，未斗到最后一刻，都唔知入场券花落谁家。
赢波即首度跻身欧联 阿特兰大半场够萨
意甲前4之争关键战，由「3哥」阿特兰大硬撼萨斯索罗。早前失落意盃嘅阿特兰大，今仗赢波即可首度跻身欧联，掌握主动权，加上近年交手佔尽上风，经常玩速战速决，半场主胜有买趁早。
（周一凌晨2时30分开赛）
依家除咗冠、亚军祖云达斯及拿玻里稳夺来届欧联资格，排名第3位至6位嘅阿特兰大、国际米兰、AC米兰及罗马，仲有机会赶上欧联尾班车。阿特兰大与国米同得66分，外号「女神」嘅佢哋，目前 因为对赛成绩较佳排第3，由于两军领先第5名嘅AC米兰1分，阿特兰大今场只要赢波，就唔使理其他球队嘅赛果，肯定以季军过终点。虽然阿特兰大于早前意盃决赛输畀拉素，屈居亚军，好彩佢哋未有洩气，上场联赛作客1比1赛和祖云达斯，近12场联赛8胜4和，强势为首度参与欧联全力冲刺。
萨斯索罗近3对赛都早输
至于排第10嘅萨斯索罗，依家大踢风流波，近7仗联赛赢得1场咁大把，何况有比路素、麦拿尼、史提芬奴辛斯因伤倦勤，战意、实力都难与阿特兰大相提并论。计晒联赛同盃赛，阿特兰大近3次对萨斯索罗赢晒之馀，全部都喺换边前取得领先优势，可见佢哋每次碰头都锺意先发制人，主胜太热冇肉食，转捧半场主胜更好路。