今日黄昏东亚锦关键之战，香港要恶斗强敌北韩，虽然两军同得6分，但因得失球不及对手，为咗出线，今仗绝对係非胜不可，不过要点样部署，先可克敌制胜呢？

以笔者几十年教波嘅经验，首先唔好再提香港足球过往如何辉煌，乜嘢上世纪50、60年代「亚洲足球王国」等美誉，统统都要抛诸脑后，亦不要妄自菲薄，如果本身因实力较逊而冇谂过想取得胜利，不如举白旗投降，因此，众港将要保持不亢不卑嘅心态作战，呢点很重要。由于港队身体对抗不俗，于防守死球或于进攻打「空战」绝对唔输蚀，预计「Kim Sir」金判坤会排出4231阵式，先做好防守，除咗死球进攻外，球员唔好太过轻出，全场保持紧密嘅阵形，更要集中精神，每人走多两步互相补位，斗攻盏自暴其短。

当港队在防守上打好基础，保持唔失波后，就需要一个字──等，千万唔好心急，因为愈急只会愈乱，当对手久攻不下，随时会露出破绽，令港队获得偷鸡入波嘅机会，即使只有2%嘅机会，若果把握到则可险中求胜，这是以弱胜强嘅必然部署。奇迹呢样嘢，冇信心、冇「吉士」的话便很难产生，係需要有心人，以及肯克服万难嘅人方能做到，因此要创造奇迹唔係冇可能。

金句：面对强敌，切忌大贪。做好防守，希望偷鸡。