由于呢个专栏给笔者很大自由度，无论想讲有关体育嘅任何範畴，都可自由发挥，况且喺坊间不断亦与球迷及爱好体育者交流，今期决定搞搞新意思，唔讲波经或体坛历史，转倾博彩之道。
查实博彩之道各师各法，假若係以自己用心钻研嘅「方程式」去买波，往往都唔会焦头烂额，因为一种「方程式」并唔会永远输硬。反而如果係朝令夕改，忽然跟下某些专家贴士，见到某队波有阴谋论又买对家，又或者有爱队亮相，因着情意结而捧场咁就弊，因为当一个人行衰运嗰阵，真係头头碰着黑。笔者本身嘅博彩之道比较正路，通常都係以波论波，就算遇到某些有阴谋论嘅场次，亦会唔提兼避之则吉，始终每周赛事繁多，毋须搵呢类变数太多嘅赛事来玩。
笔者贴波买波，除咗视乎实力及状态之外，最重要係球队有冇对胜利嘅Urgency，亦即係飢渴感。球员有拚死一战嘅Urgency，如果你又有买呢队波，球员亦间接为你搏老命，绝对係押注嘅重要指标。以刚周中曼市双雄于欧洲赛截然不同嘅表现为例，曼城主帅哥迪奥拿再倒戈母会巴塞，既要为争取出线，又要为一洗上次交手惨吞4蛋之耻，佢哋嘅Urgency远胜几近出线嘅巴塞，一开波即摆出以攻为守嘅姿态，凭主场之利反胜3比1。相反，曼联于欧霸作客土超劲旅费伦巴治，造访「地狱球场」已先蚀章，赛前揸住6分喺手，比费伦巴治多3分，难免冇乜飢渴感，最终输1比2亦属正常。
今晚英超双蓝对碰，车路士主场对爱华顿，车仔依家只差榜首3雄曼城、阿仙奴、利物浦1分，新帅干地已摸熟班波，弃用老将泰利并以最意大利式嘅方法，以唔失波为大前提，再靠射手榜「1哥」迪亚高哥斯达、夏萨特等数胡，要赢近况冇季初咁勇锐嘅「拖肥」唔难。
