笔者于上年曾亲赴英国温布莱球场，观赏前届英格兰联赛杯决赛——车路士对热刺，全场爆棚之余，一张波飞更高达5,000港元，虽然包食包纪念品，查实都几昂贵。最弊係一众豪门都当英联杯係「练兵场」，经常只派很多副选或年轻球员上阵敷衍了事，久而久之令呢项杯赛吸引力大减。如果冇记错，上届决赛曼城互射12码击败利物浦，本港并冇电视台直播，近年赌风冇先几年咁盛，令睇外国足球赛事嘅人数少咗，广东话评述亦相继减少，以乎本港转播外国波嘅高峰期已过。

以战养战效果仲好

老实讲，英超球队一季要应付联赛、英联杯及英格兰足总杯，豪门更要兼顾埋欧联战线，令佢哋会着眼于联赛及欧联两大锦标，英联杯等便沦为鸡肋。不过笔者有当主帅嘅经验，一队波有20至30人，先要搞好更衣室内部气氛，如果轮换制运作得宜，将主力、副选或小将捞匀嚟踢，不但令众将都感受到自己係有机会上位，而且无论要踢几多项杯赛，合适嘅轮换以战养战，状态差极有限，甚至可减低操练嘅强度。

除此之外，1年有4个杯可争，何不先争赢英联杯打咗个底先呢？有一个冠军落袋，唔单止增强球员嘅信心，亦可为佢哋减低心理包袱，去争逐余下嘅锦标，乃百利而无一害，好似曼联刚击败半力出击嘅曼城杀入英联杯8强，红魔主帅莫连奴都冇留力照用正选。因此笔者对于一班英超主帅，「争大杯弃细杯」嘅观念大惑不解。