畢迪斯難食“魯”

    西甲明晨有場“隻揪隻”，畢迪斯對拉科魯尼亞，呢兩支“低下層”球隊都係以護級為目標。尤其今季重返甲組嘅畢迪斯，當然唔想做升降機，所以場場波都要搏命搶分。今仗主場對住實力相差無幾嘅拉科，搶得一分得一分。

    拉科前季升上甲組，上季大步檻過有得留低，今季又係繼續展開護級之旅。從兩隊人腳班底所見，今場波叫做“水蟹蒸水蛋”，又即管睇吓邊隊可以搶到分。由於畢迪斯有主場關係，初盤開出要讓平手／半球。但睇返近五次主場對拉科，畢迪斯只得兩和三負，自己“地盤”都冇着數，受讓嘅拉科更值得捧場。

    重返甲組，畢迪斯當然要加強人腳，祖昆回歸，雲達華特及韋斯達文相繼加盟。不過名氣與年紀一樣咁大，實質效果要放長雙眼睇過先知。拉科方面，引入艾拔圖、法積及洛迪古斯。三位新球員加盟後表現有目共睹，前兩者已成為必然主力，再配合祖安法蘭、皮里斯與波格斯，計入球能力都已經強於四場只入兩球嘅畢迪斯。拉科坐和望贏。

    推介：拉科魯尼亞1:1