利記要追“素”

明晨繼續有歐冠附加賽次回合，大家比較關注嘅曼聯首回合已經有兩球在手，明晨作客布魯日應可穩住優勢殺入分組賽。所以揀咗另一場推介畀大家：利華古遜對拉素。

首戰一球落敗，今仗返到主場嘅利華古遜就要非勝不可，由於今季雙線發展要兼顧踢歐冠，利記人腳有增強，引入瑞士國腳美密迪、德國未來之星卡馬及智利中場阿蘭基斯，可惜呢位南美國腳級人馬因傷休戰。不過，球隊依然有足夠替補力，加上孫弘文、比拿拉比、卡漢路古及普路斯等好波之人，利記整體戰力實在不容忽視。球隊攻力在上季德甲中排行第二，僅次於班霸拜仁，且主場威力相當威猛，十七場聯賽祇輸過一場。今場對住實力並非強橫嘅拉素，有望翻盤成功。

拉素一向都係意甲中堅分子，上季勇奪第三位，今季開局亦相當不俗，祇在意大利盃不敵祖雲達斯，比賽狀態唔差。惜球隊過往踢作客銳利度不足，要保住一球優勢實在不易。初盤利華古遜讓半球／一球，捧利記有“素”收。

推介：利華古遜2:0