祖記作客要爭“A”

【本報消息】意甲大戰，祖雲達斯作客聖西路硬撼AC米蘭。祖記人腳、近況明顯佔優，縱使作客斑馬兵仍可睇高一線，力爭三連勝，繼續向榜首拿坡里施壓。

祖記月中聯賽不敵拉素後迅速反彈，連同歐冠盃連贏三仗，聯賽兩戰大炒烏甸及史帕爾，雖然兩戰失三球，但火力搭救狂轟十球，迪巴拿、希古恩齊破入球荒，今仗再有文迪蘇傑停賽刑滿復出，連同比真歷、貝拿迪斯治攻堅，火力強橫，硬闖聖西路有望睇好再搶三分。

斑馬後衛巴薩利提醒球隊做好防守：“聯賽十輪戰畢，球隊進攻表現很出色，但防守仍可以做得更好，表現必須更加專注。我們一直以堅固的防守取得勝利，今季防守表現下滑，教練不滿亦正常。球隊必須更加攻守平衡，才有望在聖西路取勝。”

A米防線有漏洞
AC近況麻麻，上場大勝切禾或為教練蒙迪拿稍舒一口氣。但現時帥位不穩，今仗撼祖記稍有差池或隨時落鑊。惜整體人腳不及祖記，倒戈的邦路斯停賽，防線再現缺口，加上今季鬥拉素、國米、羅馬等前列分子均輸波而回，聖西路地利亦難阻祖記搶分。

近況回勇的羅馬主場鬥博洛尼亞，人腳實力至少高幾班，射手迪斯高狀態大勇，連同柏洛迪、艾沙拉維進攻火力有睇頭，帶刀侍衛高拿洛夫罰球亦為首都狼一大殺着。羅馬主場面對兩連敗的博洛尼亞，三連勝可望到手。