曼聯迎擊鎚仔幫

    曼聯今晚主場撼韋斯咸，挾周中歐霸盃大炒飛燕諾的強勢，狀態回勇的朗尼有望領軍再贏一仗，追趕前列爭標對手。

    曼聯聯賽過去六場一勝四和一負不斷失分，目前落後榜首車仔九分排第六位，後上爭標已不容再失。雖然戰神伊巴謙莫域近期腳風麻麻，幸隊長朗尼及時回勇，周中歐霸盃一傳一射領軍大勝；新援米希達恩亦大打爭氣波，配合馬達、保羅普巴等中場好手，力足填補戰神狀態下跌的空缺。韋斯咸近三場聯賽一和兩負狀態更差，作客一勝五負成績唔合格，即使領隊比歷有一個星期時間備戰，作客奧脫福亦惡唔出樣。

    鍾斯冀朗尼破績

    朗尼還差一個入球就追平名宿卜比查爾頓的入球紀錄，守將菲爾鍾斯希望隊長今仗成功達到目標：“我會為朗尼鼓掌、喝彩。他是世界級球星，已經為曼聯效力很多年，是球會傳奇之一。我為他周中表現感到高興，希望今仗第一分鐘就取得入球。”鍾斯亦談及鬥飛燕諾表現出色的米希達恩：“我認為米希達恩踢得很好，腳下功夫到家，個人突破或傳球組織都咁出色，是陣中重要一員。正如所有球員一樣，他每日努力訓練，現在做得非常好。”

    鎚仔教頭比歷想用高空波炸散紅魔後防：“卡奴爾可能上陣。我會看看這兩天的情況，因為他今個星期才開始訓練。雖然狀態未有回復百分百，無論對手是誰，都很難應付他。他能為球隊帶來高空優勢，增加贏波殺着。”