巴塞“蝠”至心靈

    西班牙盃四強次回合明晨上演，不過兩支決賽球隊應該冇懸念，巴塞首回合大炒華倫西亞七蛋，西維爾亦四球大勝切爾達。次回合已屬例行公事，巴塞與西維爾將會爭奪今季西班牙盃。

    “蝙蝠軍”華倫西亞明晨主場再戰巴塞，要翻盤贏八球根本是不可能嘅事。以球隊近期表現，輸多場都還可以，只是視乎巴塞用乜嘢人腳及作戰心態。睇怕“蝙蝠軍”亦會自動放棄盃賽，全力集中聯賽及歐戰。初盤巴塞羅那讓球半，照捧巴塞贏開有條路。

    自加利佬接手“蝙蝠軍”後，球隊唔見有任何突出表現，近三戰連敗，連兩支搶分護級分子希杭與畢迪斯都輸埋。聯賽排名跌到落十二位，與降班線球隊只有四分之差。證明加利佬到底有幾多料，用英超模式去執教西甲踢法，完全唔啱“channel”囉。

    巴塞今仗未必會以最強人腳出戰。但巴塞替補力依然強橫，A維達爾可正選上陣，巴拉特及新星艾夏達迪等踢得巴塞肯定有一定質素，有機會上陣定必發揮出最佳水準。巴塞再勝“蝙蝠軍”應該唔難。

    推介：巴塞羅那2:0