世界盃外围赛南美洲区听朝上演连场恶战，有王牌前锋尼马停赛嘅巴西将会作客巴拉圭，论名气同国际赛成绩，「足球王国」巴西梗係赢晒，不过巴西喺邓加带领下霸气欠奉，过往出战防守力强嘅巴拉圭都冇甜头，近3次对赛都和波收场，今场作客都信唔过，巴拉圭主场受让必捧1.7倍「让球主胜」。
（开赛时间：周三早上8:45）
巴拉圭攻守兼备
今届世盃外围赛5仗拎到2胜2和1负嘅巴拉圭，係南美洲少有嘅防守型球队，佢哋只係失过4粒，属于失球最少队伍之一，上年10月佢哋就曾经试过主场守和另一南美劲旅阿根廷0:0，可见呢班波嘅防线足以抵挡强攻勐打，更何况箭头列斯卡奴上仗梅开二度，整体进攻亦见流畅，可谓攻守兼备，巴西想喺巴拉圭身上攞到入波绝对唔容易。
近3战对赛和波收场
翻查数据，巴西近3次对住巴拉圭都赢唔到，包括近2届美洲国家盃8强交手打和，「森巴兵团」2次都喺互射12码被淘汰。最惨係巴西依家踢唔出霸气，除咗尼马叫做世界顶级之外，称得上「世界级」嘅球员真係冇几多个，最弊係连尼马都因为累积黄牌够数要坐波监，以巴西依家嘅锋力，都好难撕破巴拉圭条防线囉。
