随着国际赛赛期再开，新开嘅欧洲国家联赛战火又再重燃。众所周知，作为顶级球员，除了要面对各大球会级盃赛联赛，仲要代表各自国家队应付世盃或欧国盃外围赛赛事，密密麻麻嘅赛程，肯定令到一班顶级球员嘅体力爆晒厂，如今再加设呢项新兴嘅欧国联赛事，对佢的嘅体能绝对会造成进一步嘅消耗，所以我个人认为呢项比赛本身存在不合理性，更预期不出两三年后，欧国联甚至就有遭到淘汰的可能性。
意葡大战可观性减
有见及此，唔少传统欧洲国家队劲旅，喺欧国联呢项赛事都会刻意收起大牌球星，等佢的抖抖，宁愿起用国内二三线球员应战，冇左球星助阵比赛叫座力明显受影响，球迷睇波嘅意欲都肯定大减，相信只有逢波必赌嘅赌仔愿意关注。就好似周日凌晨上演嘅意大利主场斗葡萄牙嘅A3组大战，斋睇对战双方都会以为系重量级戏码，不过葡萄牙就有头号球星C朗再次避战，连大军名单都未有入选，即刻影响赛事嘅可观性。况且踢少1场嘅葡萄牙以6分暂列小组首名，佔尽晋级主动权，呢场面对意大利打和都出线嘅情况下，一班球员未必会踢得太进取，睇好两队最终闷和收场。