一隊波，可以冇前鋒、冇左閘、甚至冇中堅；但一定唔可以冇門將！不過如此重要的位置，在球場多數只屬配角。今季英超首周，風水輪流轉，竟由門將做了主角！可惜多屬慘情。先是以千萬過檔阿仙奴的施治，季前奪三冠、社區盾贏車仔，搞到身邊廠迷雄心勃勃；豈料一「嚟真」便犯錯，間接令球隊主場輸波。廠迷唔使灰嘅，強如保方當年加盟祖記，第三場都試過接高波甩手累球隊失波，畀啲時間佢啦。
咁「逼走」施治的泰拔高圖爾斯呢？首周一樣出事！領紅兼輸12碼；反而造就「800萬後備」比高域表演。堂堂波斯尼亞國腳門將到車仔做後備，可能佢貪未必使開工都有盃捧；點知首周就要臨危落場，仲因打少個而要左飛右撲；但事實證明佢並唔係呃飯食，且表現穩健，除那記12碼，對手所有攻門均一一瓦解；下周對曼城有高圖爾斯停賽，又到比高域encore！
仲有場邊做觀眾都做到主角的迪基亞，雲高爾確狠心！以現況推測，皇馬似擺明待迪基亞下季冇約才免費要人；而迪基亞則似無法避免要於曼聯坐一季冷板。其實季尾還有歐國盃，屆時雪硬了的迪基亞隨時連國家隊都冇份、初到皇馬又狀態成疑；兩位老闆相爭，又係「打工仔」受罪，苦了迪基亞！