另一场欧联大战，巴黎圣日耳门主场迎战AC米兰，PSG上轮欧联1比4大败喺纽卡素脚下，现时喺「死亡F组」1胜1负排次席，为争出线要加多两钱肉紧，佢哋近3次欧联对意甲球队全胜，主胜睇高一线，对手A米刚喺意甲大战输畀祖云达斯，仲未回到气又要火并PSG，再输唔奇。■（Now 643周四凌晨3时直播）
PSG今季踢走美斯同尼马，基利安麦巴比成为真正核心，仲请嚟安历基执教，目标直指欧联，上场大败喺纽卡素脚下可谓当头棒喝，不过总算及早发现问题，球员执番正作战态度，其实都系好事。PSG最近两场法甲均大胜对手重回正轨，加上早前踢国际赛，「麦总」同箭头干卡路拉莫斯都有「士哥」，证明状态对办，今仗主场出击赢波机会高。
AC米兰士气低沉
AC米兰今届欧联表现平平，分别对纽卡素同多蒙特都踢成0比0，仍未打开胜利之门，估计今仗作客PSG会踢守势足球，对佢哋最为不利嘅系刚喺意甲激战祖云达斯，喺10人应战之下，最终输0比1，失利之余球员仲耗力唔少，严重打击士气，今场就算死守都好，恐怕都顶唔住对方攻势，落败属意料中事。
