艾禾尼尔弗到漏

今轮英超压轴战，诺定咸森林主ｓｐｏｒｔｓｃｎ．ｃｏｍ场硬撼般尼。森林中锋艾禾尼尔挟上季勇态，今季亦频有士哥，而且佢哋向来靠主场搵食，般尼联赛开咧3连败，睇怕今仗要继续交学费，主胜捧得过。（Now 621周二凌晨2时45分直播）

讲到森林数胡人物，非艾禾尼尔莫属，呢位尼日利亚射手曾缔造跨季连续7仗联赛入波，虽然上轮断缆，但仍交出靓助攻畀艾兰加建功，作客爆冷击败车路士，弗到漏油。森林开季联赛录得2胜2负，要留意其中3仗系客场，能够赢到2仗都算唔错，要知道佢哋不嬲靠主场抢分，上季获得38分，当中有30分系来自主场，而全季9场胜仗，主场就占咗8场，跨季近4仗联赛主场更加全部赢晒，主场威力不容小觑。

般尼慌失失等交学费
英冠1哥般尼重返英超嘅表现，就好似森林上季升班後嘅缩影，开咧连输3场之余，更狂失11粒，主帅高柏尼师承哥迪奥拿，喺英冠踢进攻足球大获好评，点知嚟到英超变得攻不锐、守不稳，上轮对热刺早早领先下都要反输2比5，後防表现慌失失，证明现实非常残酷。
虽然般尼喺上月尾英联盃，曾以1比0击败森林，但森林当时只系半力出击，加上佢哋转会窗关闭前接连签入纽奴泰华利斯、奥历治、赫臣奥杜尔、干沙路蒙迪尔等新兵，人脚更加完整，今仗难得遇弱，必定藉主场之利，替般尼呢支英冠盟主「补课」，主胜有计。