台风袭港最好留喺屋企睇波，今晚英超曼城主场斗富咸。开季3连胜嘅「蓝月」实力超班，不过近两仗都系「煲鱼生粥」仅熟，喺奇云迪布尼缺阵下，中场支援未达最佳水平，对住富咸未必大炒，3.5球入球细抵玩。（Now 621周六晚10时直播）

曼城今夏中场变动颇大，根度简同马列斯离队，奇云迪布尼又受伤长抖，对进攻影响唔细。虽然艾宁夏兰特及基亚利殊等人仍然在阵，但始终踢唔番上季水银泻地嘅攻势，上次主场对纽卡素只系小胜1比0，上轮对弱旅锡菲联，更要尾段先反胜到2比1，明显仲未上力。

富咸韧力十足

富咸上轮作客逼和劲旅阿仙奴，今季两场作客赛事录得1胜1和，周中英联盃更凭互射12码淘汰热刺，韧力非凡。葡萄牙防守中场祖奥包连夏复出，喺中场有一夫当关演出，防守靠得住。睇番两队近5次联赛交锋，总入球全开3球或以下，以富咸依家嘅高昂士气，相信唔系咁轻易大败，3.5球入球细值得支持。