女世盃:女狂牛荷蘭大駁火
时间：2023-08-11 17:08 来源：足球图库
兩強相遇爭晉級唔留手
女子世盃8強聽朝展開，先由西班牙女足火併荷蘭女足。「女狂牛」16強5比1大炒瑞士女足，盡展爭標實力，向住隊史首項國際大賽錦標進發，面對火力同樣十足嘅荷蘭女足，入球騷走唔甩。西班牙女足近4仗全開3球或以上，一於再追2.5球入球大。（Now 630周五早上9時直播）
西班牙女足今屆賽事備受睇好，事實上佢哋發揮亦相當穩定，雖然分組賽最後一輪喺篤定出線情況下，慘吞日本4蛋，但大熱地位從未動搖。「女狂牛」今屆4戰3勝1負，入13球失5粒，火力驚人，上仗16強大炒瑞士，以射手邦瑪迪為首嘅鋒線發揮得淋漓盡致，球員信心爆棚下，面對任何對手都放膽照攻，為爭入4強唔會手軟。
「橙軍」積兒洛特腳風順
上屆亞軍荷蘭女足實力唔曳，今屆4戰3勝1和，入11球僅失1球，分組賽最後一輪大勝越南7比0，更創下今屆賽事最大差距勝仗，上輪16強以2比0淘汰南非輕鬆過關，王牌積兒洛特賽事累積4個入波，腳風甚順，面對勁敵亦有力數胡。今仗強強對碰，4強席位誰屬難測，但以雙方咁強大火力嚟睇，入波唔會少，大盤屬不二之選。
