欧国外F组焦点战，比利时主场火并奥地利。「欧洲红魔」新帅泰迪斯高带领下拨乱反正，箭头卢卡古更重拾射门鞋，加上主场出击特醒，要赢奥地利冇难度，主胜有计。

（周日凌晨2时45分开赛）

堂堂2018年世盃季军，比利时喺上年世盃竟然分组赛出局，令人大跌眼镜，主帅马天尼斯离职，队长夏萨特退出国家队，搵来新帅泰迪斯高重建球队。呢位前史浩克04及RB莱比锡教头只系略改阵式，弃用3人防线，改打4231阵式，中场重用活力十足嘅阿马度奥拿拿，化被动为主动，泰帅首度领军喺欧国外先大胜瑞典3比0，次仗热身赛领先3粒下赢德国3比2，两连胜开个靓头，箭头卢卡古喺呢两仗入4粒，脚风转顺，就算队长奇云迪布尼因伤倦勤都冇有怕。

奥地利作客6战4败

另边厢，奥地利由前曼联及RB莱比锡教头兰历克执教，近4仗赢晒，包括F组头两轮顺利赢波，但要留意对手只系阿塞拜疆及爱沙尼亚，而4仗中有3仗来自主场，另一场喺中立场击败弱旅安道尔，单计作客近6仗4度落败，不宜高估。以波论波，比利时梗系质胜一筹，依家喺泰帅接手後重拾信心，睇埋佢哋近5次主场出击，取得4胜1负，今仗有力乘胜追击。