熱刺近年雖只係倫敦三哥，踏入2010年後，只有11/12球季排名高過車仔，其餘年份嘅名次，全居喺阿仙奴同車仔之後；但總排名必企穩喺四至六名，歐霸常客，最勁試過喺「大聖爺」加里夫巴利領軍下，巔𥧌闖到歐聯八強，但近季球員出入頻繁，買唔到好貨。
比利時人近年喺英超好吃香，但熱刺今夏爭贏修咸頓，用1,150萬鎊搶走艾達韋列特，暫時成為今夏英超購入最貴嘅中堅；並放走原隊長卡保奧同前年「波亞斯餘孽」基利捷斯，一啲都唔巴閉。艾達韋列特喺阿積士踢左閘出身，同現時喺熱刺故劍重逢嘅同胞兼舊隊友維頓漢，剛好喺熱刺互換位置；前者上季借到修咸頓，各項防守數據一般，只有解圍一項平均每戰有5.5次，即係最叻踢一腳清嘅擦鞋仔波，腳法平平，唔值千萬鎊身價喎。
前場補人當務之急
中、前場未補人，反而連廣州恒大都撬到當打嘅荷西保連奴走，熱刺躉應該最擔心；計上季最多入波嗰三位，「入球機器」箭頭哈利卡尼、翼鋒查迪尼及攻中基斯甸艾歷臣合共攻入42球，竟佔去球隊聯賽入球量嘅72%，太側重咯。哈利卡尼呢張王牌，上季同另外兩位前列嘅土炮射手查理柯士甸、比拉希奴一樣，喺賽季最後兩個月走晒樣，入球寥寥；比起過檔紅軍嘅賓迪基，最後兩個月10戰入10球差得遠，英國人新一代多官仔波，耐戰力不足，真係好似言之成理。
傳聞會用1,500至2,000萬鎊，購入西布朗嘅比拉希奴，代艾迪巴約同蘇爾達杜，「肥仔普」非必要都唔會敢打雙箭頭；問題出係球隊靈魄、又係出身阿積士嘅基斯甸艾歷臣，上季比前季少交五次助攻僅剩兩次。熱刺進攻喺強隊中算係最單調，唔係靠卡尼硬闖，就係艾歷臣遠射，如果唔搵人分擔入球責任，釋放有法比加斯傳送才華嘅艾歷臣，卡尼又必成被盯死對象。熱刺今季嘅凶險情況，就好似下月開鑼首戰，作客曼聯一樣。