阿仙奴尚欠一粒「鑽石」

倫敦早來嘅冷鋒，希望會令雲老清醒面對阿仙奴嘅問題。
見Facebook有朋友透露，由攝氏30多度嘅炎夏意大利，北上氣溫驟降10多度嘅英國，當堂唔適應病倒；不過，反常嘅天氣，無阻「廠迷」喺倫敦四角賽，兩天合共幾乎坐滿近12萬座位嘅熱情，睇住球隊打叠兩戰一球不失連勝捧盃，期望會高。
其他歐洲列強，穿梭各地為國冠盃打拼，阿仙奴領隊雲格錫住一眾「子弟兵」，喺重開嘅主場靚草地，攝氏10多度氣溫兼對手里昂同禾夫斯堡零壓迫下；只有奧斯爾得寵連踢兩場正選，試搭唔同中前場球員，「大眼仔」呢個10號位，艾朗藍斯同韋舒亞恨到口水流。
簽到鋼門施治，拍掌叫好，但係副隊長梅迪薩卡，轉身慢始終係計時炸彈；仲有防守死球近季最得人驚，禾堡剛戰上半場有兩次角球機會可先開紀錄，都係阿仙奴守將喺禁區走甩對手。左閘蒙利爾或者基蘭基比斯都係走緊下坡，要上季季中後打到曉飛嘅高基連今季一樣要有咁嘅超水準，喺後半場不斷補位，問題先不致嚴重暴露。
隊長阿迪達33歲照續約，加上另一西班牙人辛迪卡索拉同韋舒亞輔助防守，其實效果唔算好，但睇怕主攻嘅雲老唔預再買防中，下一個目標會係箭頭。
韋碧克未操得，禾仔作為正箭頭次選，上季尾英足盃決賽大炒維拉後，勇態延續至今，但對手根本唔強；反而冇咗高大威猛嘅基奧特喺前場孭位，阿仙奴攻勢就似剛戰禾堡嘅上半場，用禾仔竄嚟竄去，同首戰上半場領先里昂四球時用基奧特掛帥，威力差得遠。
市場上正有筍貨出售，波斯尼亞「鑽石」迪斯高，上季初先續約曼城四季；但未知係咪「世界盃年」打謝咗，上季入球暴跌至聯賽得四球，剛被領隊比歷連尼通知隨時可走；29歲嘅迪斯高做過德甲神射手，又係藍月亮前季奪聯賽冠軍嘅重要功臣，近季好多好球員去到曼城越踢越霉，不足為奇。迪斯高信心回復，唔會差得過今夏一眾轉飯鑊嘅「名牌」一線射手，好似文迪蘇傑、法卡奧、積臣馬天尼斯同尼格度。
迪斯高，喺曼城11萬周薪唔貴，又或者雲老用「契仔」韋舒亞作利誘又點睇？雲格果斷啲入貨，阿仙奴今屆形勢先叫大好。