今晚英超快车有下游对决，「喜鹊」纽卡素主场火并「拖肥糖」爱华顿。两军啱啱喺冬窗大举增兵，实力升呢，爱华顿更由林柏特接手，新帅效应不容忽视，为抢分护级唔会保守，双方近年碰头例演入球骚，呢场「6分波」一於博2.5球嘅大盘。（Now 623周三凌晨3时45分直播）

纽卡素贵为全球最富有球队，但头21轮联赛入得21粒，因此喺冬窗豪使9,200万镑，接连签入捷比亚、基斯活特、般奴古马雷斯同丹般恩。巴西国脚般奴古马雷斯组织力强，捷比亚喺右路传中波煞食，箭头基斯活特更加系擅顶之人，可为王牌辛特麦斯明及祖连顿开路，呢3位新兵能为「喜鹊」疲弱进攻注入新元素。

林伯铁腕治军有料到
爱华顿早前怒炒宾尼迪斯，邀得前车路士教头林柏特救亡，并且借得中场云迪碧克、迪利阿里及安华艾加斯，锐意加强创造力及後上入楔。虽然中锋卡维特利云再度受伤，但仍有李察利臣及迪马雷格雷候命，新人翼锋安东尼哥顿今季後备落场屡有佳作。日前英足盃第4圈大胜宾福特4比1，首度领军嘅「林伯」旗开得胜，有指佢订立4大罚则，包括迟到罚钱、食饭唔准玩手机，以铁腕治军收到奇效。

尾三嘅纽卡素仍处於降班区域，打少1场嘅爱华顿亦唔好得几多，仅领先「喜鹊」4分，稍有差池随时被拉埋落水，为咗摆脱护级漩涡，今仗「6分波」大家都想赢，双方近5次交手，4次开3球或以上，2.5球嘅大盘有计。