櫪木兵源單薄攰到爆
周三日乙有櫪木SC主場迎戰北九州向日葵，客隊北九州向日葵屬目前日乙狀態最好嘅球隊，聯賽錄得9連勝後已殺上第2名，大有機會取得升班資格，今場面對櫪木SC有望乘勢全取3分，客勝抵捧。（周三晚6時開賽）

櫪木SC今季高舉防守大旗，場場以唔輸為目標，搞到成績普通，主場表現亦令人失望，近5場聯賽主場只得1勝，佢哋最大弱點就係入球能力極差，對上5場聯賽主場有4次「食白果」，進攻中場大崎淳矢又受傷缺陣，將進一步削弱攻擊力。而且櫪木最大問題係板櫈深度唔夠，復賽後唔少球隊怕球員易傷，往往安排大量輪換，部分兵源充裕嘅甚至會出現8個調動，櫪木就平均得4人輪換，班球員唔殘先奇，對住強隊非常蝕底。

北九州混血前鋒托弗
北九州向日葵氣勢如虹，9連勝創咗球會紀錄，24歲射手施雲奴迪沙路最近狀態巔峰，呢位意大利、日本混血兒門前夠冷靜，專注力又強，近7場比賽攻入9球，佢同新星前鋒町野修斗組成堪稱日乙最強嘅鋒線，成為球隊大爆發嘅最大原因。北九州向日葵作客演出非常穩定，近5場聯賽作客豪取4勝，乘住超強氣勢，今仗極大機會再下一城。