今日下晝韓職重頭大戰，1哥蔚山現代主場硬撼FC首爾。今仗好大機會係FC首爾中場奇誠庸回流後首騷，即刻要同昔日「首爾雙龍」好拍檔、今仗卻各為其主嘅李青龍正面交鋒，「雙龍會」令人期待，隨時鬥攻，2.5球嘅大盤有買趁早。

（無綫85台周日下午4時30分直播）

經過10多年外流歐洲生涯後，同樣喺FC首爾出身、有「首爾雙龍」之稱嘅李青龍及奇誠庸，今年終於鳥倦知還，不過李青龍未有回巢，反而加盟蔚山現代，奇誠庸直至7月才落實回歸母會，但因右足踝傷患關係，拖到上周五先進入今仗大軍名單，好大機會係佢自2009年11月21日後，前後相距3,936日嘅首場韓職賽事，仲要對住倒戈相向嘅老友李青龍，絕對係今輪最矚目大戰。

李青龍：友情放埋一邊
事實上，兩人甚少正面較量，今次係十幾年嚟第二次，奇誠庸同李青龍過去唯一一次對賽，係喺2015年12月29日嘅英超，嗰場波史雲斯0比0打和水晶宮。

李青龍反而唔係咁期待傳媒筆下嘅「雙龍打吡」發生：「首爾唔易對付，加埋奇誠庸就更加難踢，最好佢就遲啲復出啦，下次先啦。」作為好朋友，李青龍話希望奇誠庸健健康康咁馳騁球場，即使真係要交手，佢強調會將友情放埋一邊，以幫助蔚山贏波為目標。

正所謂落場無父子，相比啱啱好番嘅奇誠庸，李青龍回流後表現唔錯，14場聯賽入3球及交出2次助攻，箭頭祖利亞尼加奧更銳不可當，上仗又省兩粒，呢位巴西射手今季已有20球進，腳風超順，連李青龍都預言佢入波會達「30+」，難怪蔚山近8仗聯賽豪取7勝1和，位居榜首喇。不過，首爾自易帥改由金浩英揸旗，近4場取得3勝1和，明顯有起色，尹柱泰、江漢敏等土炮亦有更多表演機會，信心返晒嚟唔會死守。蔚山今季聯賽入咗38粒，火力冠絕韓職，近8仗聯賽亦有5次開3球或以上，主場出擊更加會搶攻，大盤咪錯過。