世上最引人入勝嘅歐聯決賽，巴黎聖日耳門對拜仁慕尼黑會喺今晚上演，趕及於歐洲4大聯賽開咧前完成；喺新冠肺炎疫情嘅特殊環境下，無論邊隊捧盃而回，都會係一個特別嘅冠軍。

睇慣呢個專欄嘅讀者，都知道我向來「是就說是」，唔會講明哲保身、模稜兩可嘅說話，堅持之前嘅預測，拜仁會登上王者寶座。雖然聖日耳門喺4強重新起用「三叉戟」尼馬、基利安麥巴比及迪馬利亞，連同頻有士哥嘅馬昆奴斯哥利亞，殺到RB萊比錫措手不及。

前中後踢到曉飛
不過你有4個具威脅，拜仁則全隊都咁煞食，今屆歐聯已入15粒嘅射手羅拔利雲度夫斯基唔使多講，仲有重拾佳態、走位飄忽嘅湯馬士梅拿及基拿比，甚至連甘美治同艾方素戴維斯都「雙閘齊飛」，踢法神似利物浦嘅阿歷山大阿諾特同安德魯羅拔臣，重視側擊拉闊空位，令對手難以防範。

呢支德甲班霸技術、速度、力量、對抗瓣瓣有，何況拜仁喺4強淘汰里昂前，其足智彩嘅奪冠賠率為1.57倍，依家已跌到1.46倍，擺明熱透，冇得拗頸，正如我之前預料，拜仁將會第6次登上歐洲之巔。