今晚有場蘇超補賽，由聖莊士東主場迎戰鴨巴甸。由於鴨巴甸早前有球員違反禁令到酒吧消遣，搞到部分賽事要延期，一班涉事球員隨時被內部處分，陣容難望完整；聖莊士東開咧表現麻麻，加上近年碰頭大家都打穩陣波，捧入球細正路。（周五凌晨2時30分開賽）

鴨巴甸球員違禁令或缺陣
鴨巴甸喺開咧戰輸畀格拉斯哥流浪後，當晚麥高治、卡斯格拉夫、史葛麥堅拿等8名球員去咗酒吧「哭波喪」，完全無視當地嘅新冠肺炎防疫禁令，結果隨後有兩人喺檢驗中呈陽性反應，令到隊波第2至4輪聯賽被迫全部延期，包括次輪對聖莊士東延至今晚先踢，狀態唔慌好。除此之外，鴨巴甸亦發出道歉聲明，話班球員犯咗嚴重錯誤，甚至考慮作內部停賽處分，無論對實力或士氣都有影響。禍不單行嘅係，列斯聯借將艾蒙臣操練時重傷長抖，鋒力進一步受削弱。

相比起只踢咗1場嘅鴨巴甸，聖莊士東已經踢過3場聯賽，成績為1勝1和1負，表現唔見突出。不過佢哋上仗擊敗基爾馬諾克開齋，門神艾利奧特柏列殊左飛右撲，絕對係贏波功臣，有佢鎮守大門，相信會穩定軍心。翻查紀錄，兩隊近6次交手合共入得11球，全部開2球或以下，既然雙方都冇乜贏波把握，寧向細盤埋手。