日職快車上演矚目大戰，榜首川崎前鋒主場迎戰排次席大阪櫻花。前鋒今季走勢超勁，錄得9勝1和佳績，不過今場遇到對手，櫻花今季作客不敗，而且對賽方面長期食住前鋒，受讓捧櫻花讓球客勝。（有線661及601台周三晚6時直播）

川崎前鋒近況弗到漏油，聯賽9勝1和高踞榜首，計埋盃賽成績，13戰取得11勝2和，上周末到訪北海道面對擅踢主場嘅札幌岡薩多，竟以6比1狂數對手，中場三笘薰及小林悠梅開二度，再睇番隊波入球分布，小林悠固然是得分主力，巴西射手李安度達美奧、中場長谷川龍也及家長昭博均有入球能力，進攻遍地開花，令對手防不勝防。

櫻花防守硬淨
雖然川崎前鋒攻力強勁，但只要防守得宜，並非無可匹敵，今場對手大阪櫻花正是開季至今聯賽失球最少兩隊之一，10戰僅失6球；而且佢哋戰績穩定，聯賽及盃賽作客6仗錄得5勝1和，上周末作客另一前列勁旅柏雷素爾，就以3比1贏波，巴西前鋒般奴文迪斯及中場西川潤均有進帳，今仗挑戰榜首川崎前鋒，有一定搶分機會。再睇對賽往績，櫻花更係前鋒剋星，近6次交手櫻花取得5勝1和不敗，川崎前鋒要破宿命料有難度，讓球客勝捧得過。