爭入季後賽唔衰得
周二下午澳職，墨爾本城出戰阿德萊德聯。墨爾本城雖然實力更勝一籌，上場亦擊敗常規賽冠軍FC悉尼，係威係勢，但因穩奪季後賽資格，難免會有所保留。相比之下，阿德萊德聯復賽後4場聯賽取得2勝2和，今場睇好鬥志旺盛嘅客隊，受讓捧讓客[+1]。

（myTV Gold 302、Now 639、有線655及615台周二下午5時30分直播）

阿德萊德聯近4仗不敗，當中包括戰勝珀斯光輝及賽和FC悉尼，前鋒基斯甸奧薛夫喺呢4場波更有3球進帳，狀態甚佳；「阿聯」現時排聯賽第6，比排第7嘅西部聯多2分但多踢2場，為爭取季後賽入場券，不容有失，戰意必堅。

提防墨爾本城留力
至於墨爾本城現居聯賽次席，季後賽資格冇走雞，佢哋喺復賽後僅踢1仗，就係上周2比0擊敗FC悉尼，不過墨爾本城其實已經無緣常規賽冠軍，亞軍席位又接近十拿九穩，今場輸贏對大局冇太大影響，可能索性留力季後賽，鬥志令人懷疑。

當然，墨爾本城上仗贏FC悉尼，首席射手占美麥卡倫及格力洛尼各建一功弗到漏，前者今季攻入19球，包辦球隊接近一半入球，但相信「阿聯」定必針對性派專人看管，減低對方攻門機會。況且論對賽往績，兩軍近6次碰頭，阿德萊德聯於法定時間獲2勝3和僅1負，不落下風，仲可以受讓必捧讓客[+1]。