澳職今日上演西悉尼流浪者主場對珀斯光輝嘅關鍵大戰，珀斯光輝目前位處第5位，要保住前6踢季後賽，最後3仗不容有失，西流數字上仲有機會入季後賽，不過近期賽程密集踢到殘，光輝睇住食可以秤先，平手盤捧珀斯光輝。

（myTV Gold 302、Now 639、有線655及615周二下午5時30分直播）

西悉尼流浪者上星期一先至展開復賽首場聯賽，頭2場拎到1勝1和成績，但今場係短短9日之內第3仗，而且前2場正選陣容只有1個變動，今場如果再唔輪換，球員體能未必支持得住。新近坐正嘅教練馬歷尼手上兵源唔多，尤其門將丹尼爾盧柏拒絕歸隊，後防韋馬寧受傷缺陣，西悉尼流浪者好可能要被逼起用新人。

光輝近4次交手3勝
珀斯光輝原本以爭奪亞軍為目標，但近2場聯賽落敗後，依家當務之急係保住季後賽資格。珀斯光輝早前到悉尼準備復賽，要先隔離14日，大大影響球隊備戰工作，上場對阿德萊德聯上半場失4球，好大程度係因為準備不足，不過今場有5日休息備戰下，可望以更佳狀態出戰。翻查往績，珀斯光輝近4場對西悉尼流浪者取得3勝1和成績，有「格食格」味道，今場信珀斯光輝可反彈，平手盤更值捧場。