降班邊緣同熱拿亞分途搏命
今晚意甲煞科，既然祖雲達斯已經封王，焦點就落喺護級生死戰，排尾3、4嘅萊切及熱拿亞為咗有得留低，兩隊只能活一隊。佢哋分途出擊，其中萊切主場硬撼帕爾馬，由於萊切形勢非常被動，非勝不可下要豁出去搶攻，中場文高素近期腳風奇順，撞正將有富豪入主要爭取表現嘅帕爾馬，隨時鬥攻，3.5球嘅入球大不容錯過。

(myTV Gold 302、Now 639、有線655及615台周一凌晨2時45分直播)

先講講護級形勢，依家最尾嗰兩隊史帕爾同布雷西亞已篤定降班，排尾3嘅萊切就落後尾4熱拿亞1分，而且對賽輸蝕，千祈唔好諗住自己打和而熱拿亞輸波呢啲縮數，因為就算咁樣追到同分，亦會因為對賽成績較差而屈居人下，所以今仗對萊切嚟講係非勝不可，仲要望熱拿亞失分先有價講，極度被動。

撼帕爾馬落場即搶攻
萊切目前能夠掌握嘅只有自己嘅成績，必定盡地一煲搶W，佢哋近3仗獲2勝1負，包括上輪反勝烏甸尼斯，令士氣大振。萊切為護級近期亦採用冒險踢法，落場即主動搶攻，中場文高素近11仗有6球進帳，腳風奇順，若果單計主場，萊切近6仗有4次開4球或以上，全部有入波及失波，真係入得又失得。

另一邊廂，原本踢緊風流波嘅帕爾馬，因有傳卡塔爾富豪快將入主，近期大踢爭氣波，希望喺新老闆進駐前留個好印象。帕爾馬之前連贏拿玻里同布雷西亞，上仗對阿特蘭大反輸1比2，雖敗不辱，今仗唔會因萊切要護級而hea踢，3.5球嘅大盤有買趁早。

熱拿亞打「羅」主W穩陣
至於同時間開波嘅熱拿亞主場對維羅納，熱拿亞今仗目標鮮明，只要贏波即護級成功，毋須理會其他賽果，佢哋近3場主場贏2場，只係輸過畀勁旅國際米蘭，維羅納冇晒目標應該唔會阻人發達，主勝有計。

（myTV Gold 301、Now 638、有線654及614台周一凌晨2時45分直播）