英超於上周日圓滿閉幕，嚟緊周六深夜將緊接上演英足盃決賽，兩支倫敦宿敵阿仙奴、車路士於溫布萊球場爭奪冠軍寶座。今次係兩軍近4年第3次會師決賽，之前2次雙方各贏一次，阿仙奴如果今場輸波，將會相隔25年後再次缺席歐洲賽，為保住金漆招牌、為名、為利、為報仇，阿仙奴必須盡地一煲，把握最後機會求翻身！

阿仙奴係英足盃史上成績最好球隊，過去20次入決賽有13次捧盃，對上1次決賽輸波，已經係2001年不敵利物浦1比2，之後6次都能夠順利封王，包括最近1次於2016/17球季以2比1擊敗今場對手車路士；兩軍喺上屆歐霸盃決賽亦合演倫敦打吡，結果車仔憑倒戈嘅基奧特入波大勝4比1，令阿仙奴失盃兼失落歐聯入場券。

近25年未試過缺席歐洲賽
阿仙奴今季喺英超排第8，係自1994/95年度排第12位後、25年來喺英超嘅最低排名，而且佢哋已經於歐霸出局，今場係「兵工廠」爭取出戰來屆歐洲賽嘅最後機會。阿仙奴對上一次缺席歐洲賽係1995/96球季，當時傳奇領隊雲格仲未上任，甚至部分年輕一輩「廠迷」都可能未出世，對呢班球迷嚟講，如果歐洲賽見唔到阿仙奴身影，可以話係絕無僅有，阿仙奴唔想再咁羞家，一定要拚盡。

事實上，阿仙奴自「達Sir」阿迪達上任後表現大躍進，早排仲連環擊敗英超1哥利物浦及2哥曼城，氣勢強勁，秤落絕對唔會輸蝕畀車路士。

林伯達Sir首次入決賽
至於進入「後夏薩特時代」嘅車仔喺聯賽取得第4名，成功確保來屆歐聯參賽資格，加上歐聯進身16強，由於首回合對拜仁主場淨輸3球，雖然理論上已經出局，不過對首次領軍出戰英超嘅林柏特嚟講，已經算係超額完成。「林伯」同「達Sir」嘅執教生涯都唔算長，今次同樣係首度領軍打入決賽，臨場調兵遣將好考功力，即管睇吓邊個可以寫下歷史新一頁啦！