今晚英冠附4強次回合，富咸返主場再鬥卡迪夫城。由於富咸射手阿歷山大米祖域繼續倦勤，首回合又lead住兩粒，正式你急佢唔急，今仗勢必再擺鐵桶陣，何況卡迪夫城嚟到附加賽明顯冇晒油，焗攻更加有心無力，不妨再追2.5球嘅入球細。（周五凌晨2時45分開賽，馬會網上文字直播）

富咸雖有射手阿歷山大米祖域受傷，但主帥柏加穩中求勝嘅策略部署得宜，首回合先守住半場，易邊後靠基巴奴同約舒亞奧路馬各省一粒，作客贏卡迪夫城2比0，搶佔先機。據報米祖域仍未好番，若果殺入英冠附決賽先可復出，因此今仗唔使預佢，既然上仗冇佢都照贏，今仗輸1球都可晉級，隨時再擺鐵桶陣迎敵，睇定先食。

卡迪夫城油盡燈枯
卡迪夫城喺首回合有主場之利，卻踢到老鼠拉龜冇碇埋手，似乎唔太擅於打主攻，依家仲落後緊2粒，要焗攻更不知所措。睇番卡城喺聯賽末段搏得好盡，最後先攞到附加賽資格，與聯賽末段已開始留力打附加賽嘅富咸相比，明顯冇晒油。

而且講到防守，富咸真係有一手，連埋首回合在內，近7仗有6次開2球或以下，其中5仗保持清白之身，加上近4次對卡城全開2球或以下，斯維相信富咸可守住優勢入決賽，2.5球嘅細盤值得再追。