蘇超周六晚上開咧，揭開戰幔的是「Big 3大戰」鴨巴甸對格拉斯哥流浪。鴨巴甸近年戰績冒升，已經升格同傳統勁旅些路迪及格拉斯哥流浪合稱「蘇超Big 3」，雖然未致於成為爭標熱門，但有權左右大局，些路迪領隊連儂同格流主帥謝拉特，都要諗吓計點應付呢隻「鴨」。

格拉斯哥流浪2012年因財政問題被罰降至蘇丙，再於2016年重返蘇超，呢4年間鴨巴甸已經成為蘇超一股新勢力，與一般球隊已經拉開了距離，尤其主場成績一直處於前列位置，等閒球隊作客鴨巴甸都好難搶分。

揭幕戰鬥格流有雞偷
就如今場對手格拉斯哥流浪，近5次聯賽作客鴨巴甸，只得2勝3和，事實上，兩軍實力及交手往績相若，近10次碰頭，雙方各贏3次打和4次，每次都踢得難分難解，鴨巴甸主場受讓確係值得諗。

格拉斯哥流浪前鋒迪科爾受傷，喺揭幕戰未能上陣，呢位37歲前英格蘭國腳上季為格流聯賽上陣20場射入13球，球隊今場可能要靠「X Factor」，就係羅馬尼亞傳奇球員赫傑囝囝伊亞尼斯赫傑。呢名21歲中場今年1月由比利時亨克以借用形式加盟，到5月正式過檔格流，今季謝拉特可能以佢做球員核心打造更有創造力及侵略性嘅戰術，挑戰些路迪霸權。

些路迪撲擊咸美頓
至於些路迪會喺周日登場，撲擊咸美頓。些路迪新季目標，當然係挑戰破紀錄嘅蘇超10連霸，尤其些路迪啱啱呢季喺爭議聲中奪冠，球隊上下都冇乜癮，今季就要「堂堂正正」贏得錦標，證明自己實至名歸，首戰咸美頓肯定唔會錫力。些路迪近9次對咸美頓全勝，而且7次開3球或以上，相信今場都會係入球騷。