意甲好戲碼，國際米蘭主場迎戰拿玻里，由於祖雲達斯已經提早奪得冠軍，國米今場只能為亞軍名銜而戰，主帥干地首季領軍，當然要力爭最高排名，「老二」之位都唔會放過，加上兩位前曼聯射手盧卡古、阿歷斯山齊士近況大勇，有力擊敗拿玻里，報番意大利盃被對方淘汰之仇，一於捧主勝。（myTV Gold 301、Now 638、有線654、614、662及602台周三凌晨3時45分直播）

意甲亞軍之爭其實好激烈，第2位嘅國際米蘭都只係領先阿特蘭大同拉素1分，干地為證明自己有能力下季捲土重來，梗係要爭取最佳成績，令管理層對佢有信心。事實上，國米近期狀態回升，盧卡古、阿歷斯山齊士上場仲一齊入波，表現吐氣揚眉。其中盧卡古今季意甲已經有23球進帳，成為國米史上首季踢意甲入波第3多嘅球員，比第2位「大哨」朗拿度少2球，盧卡古一定想把握最後2場數胡機會，爭取超越呢位巴西名宿。

至於阿歷斯山齊士復賽後，表現脫胎換骨，近5場入2球兼交出4次助攻，佢同盧卡古非常合拍，大大提升國米攻力。國米上月意大利盃4強次回合被拿玻里淘汰，今場返到自己地頭，必定會趁機報仇。

拿玻里遇強冇運行
拿玻里上場贏到薩斯索羅，唔多唔少靠VAR幫手，將對手4次入球都判無效。睇番拿玻里今季作客遇強即屈，包括輸畀祖雲達斯、羅馬、拉素、阿特蘭大，近兩場作客對弱隊都贏唔到，包括打和博洛尼亞，以及不敵帕爾馬，今場到去聖西路球場，情況更加唔樂觀。