水晶宮6連敗等放假
今晚英超尾場搶分大戰，狼隊主場迎戰水晶宮。英超得番2輪，歐洲賽入場券之爭進入決定性階段，力爭來季歐洲賽資格嘅狼隊戰意鮮明，主場出擊3分志在必得；水晶宮上岸後變咗「黃大仙」，6連敗冇眼睇，直取主勝。■（Now 621周二凌晨3時15分直播）

狼隊今季一直緊隨前列「主車群」，雖畀利物浦及曼城拋離，但同其餘前列幾隊咬得好緊，現時排名仲高過阿仙奴，即使爭奪歐聯席位機會微乎其微，論到獲取歐霸盃參賽資格，就仍然手握主導權。

魯爾占美尼斯狀態佳
狼隊復賽後7仗取得4勝1和2負，表現不過不失，墨西哥箭頭魯爾占美尼斯狀態唔曳，前仗主場3比0大炒愛華頓，及上輪作客和般尼都為球隊取得入波，今晚回師主場出擊，又係呢位射手數胡好時機。

水晶宮自復賽首仗擊敗般尼茅夫後無以為繼，聯賽連輸6場，當中作客3連敗兼未入過波，上仗作客護級分子阿士東維拉都淨吞2蛋，反映護級上岸後，球員已無心戀戰，今勻對住實力更強嘅狼隊，落敗無可避免。