今晚英超壓軸戰由般尼茅夫主場迎戰李斯特城。般尼茅夫自聯賽重開一蹶不振，降班機會愈嚟愈大；李斯特城連同停擺前聯賽近5場作客未贏過，當中2場食白果僅入3球，火力大減，4次總入球開2球或以下，相信今場入波唔會多，推介2.5球入球細。（Now 621周一凌晨2時直播）

護級關頭踢得更謹慎
般尼茅夫係英超復賽後表現最差球隊之一，頭4場接連不敵水晶宮、狼隊、紐卡素及曼聯，上場對熱刺雖打和0比0，但目前仍排聯賽榜尾3，狀態、信心均跌落谷底。般尼茅夫早前作客曼聯慘敗2比5，今次再鬥另一支爭前4球隊李斯特城，相信吸取教訓後會先做好防守，踢得更加謹慎，力求穩中求勝。

李斯特城目前以59分排聯賽榜第4位，仍然未穩袋下屆歐聯入場券。事實上，「狐狸」喺復賽後，聯賽連盃賽6戰僅得1勝3和2負，球員狀態未如理想，上周中作客阿仙奴亦只靠對手末段10人應戰，藉人多打人少嘅優勢，先至由前鋒占美華迪入波扳平1比1，既然李斯特城近5場聯賽作客有4次開2球或以下，今場一於再追入球細。