意甲前列大戰，榜首祖雲達斯主場硬撼「進攻之王」阿特蘭大。祖記周中意外2比4不敵AC米蘭，聯賽7連勝走勢斷纜，士氣遭受一定打擊。阿特蘭大今季15場聯賽作客10勝4和1負，係今季意甲作客王，對住新敗嘅祖記有本錢偷雞，阿特蘭大受讓必捧讓球客勝。

（myTV Gold 301、Now 638、有線654及614台周日凌晨3時45分直播）

穩坐榜首戰意易鬆懈
祖雲達斯上場聯賽喺下半場初段領先2球嘅優勢下，竟然連失4球敗走AC米蘭嘅聖西路球場，某程度上因為祖記老將偏多，賽程又太緊密，以致體力不繼。意甲重開前，祖記已經踢咗2場意大利盃賽事，不足1個月踢足7場，根本不能期望球隊每場皆勝。再者，祖雲達斯已經領先第2位嘅拉素7分，加上拉素近況欠佳頻頻「自爆」，祖記1哥位已極為穩陣，戰意或會鬆懈，即使保羅戴巴拿復出，也難言穩勝。

阿特蘭大今季火力全開，暫入85球冠絕意甲，聯賽連盃賽近11場全勝，當中包括喺意甲擊敗拉素及拿玻里2支勁旅，表現極具說服力。阿特蘭大今季作客成績仲叻過主場，15場聯賽作客攞得34分，近5場作客聯賽全勝，加埋攻入20球，絕對有本錢同祖記抗衡，受讓值得捧場。