爭標重燃希望
意甲豪門國際米蘭今輪將會作客維羅納，由於聯賽榜前2位球隊祖雲達斯、拉素上場齊齊輸波，令國米重燃爭標希望，今場必定搶攻求勝。不過，維羅納亦非善男信女，近6場聯賽主場贏5場，擁有不俗反擊力，首選中位數2.5球嘅入球大。

（無綫myTV Gold 301、Now 638及有線654、614台周五凌晨3時45分直播）

雖然國米現時落後榜首祖記11分，但踢少1場，只要今場贏波，就可以拉近距離至8分，之後仲有7場聯賽可以追，依然有希望捧盃。事實上，國米今季簽入多位球星，就算攞唔到冠軍，亦要盡量爭取更多勝仗提升排名，先至可以向老闆同球迷交代。

維羅納主場旺開大
國米中前場猛將如雲，盧卡古頭30場聯賽已經有20球進帳，同1998年朗拿度踢國米嗰陣睇齊，加上拿達路馬天尼斯、基斯甸艾歷臣都有數胡能力，甚至阿歷斯山齊士早前對布雷西亞都取得入球，個個有能力搵食，國米要攻破維羅納大門，應該唔難。

不過，國米2位後衞巴斯東尼、迪岩布斯奧停賽，令防線存在隱憂，特別係維羅納今季主場表現出色，曾經以2比1擊敗祖雲達斯，相信有力喺國米身上取得入球，既然維羅納近8場主場聯賽有7次總入球達3球或以上，今場捧2.5球嘅入球大最穩陣。