紅軍封王後漫不經心
今晚英超尾場，新科冠軍利物浦作客白禮頓。仍然要搶分護級嘅白禮頓，復賽獲2勝1和1負，手下敗將仲包括阿仙奴；相反目標已達嘅紅軍表現漫不經心，而且佢哋近5場作客只得1和4負0入球，白禮頓挾地利有望搶分，受讓一球捧下盤。（Now 621周四凌晨3時15分直播）

講真今場波觀賞價值唔算高，除非你係死忠球迷，如果要返工嘅話，捱眼瞓睇波真係要諗過！不過唔好睇唔代表唔好賭喎，從博彩角度，呢場其實幾好路。

利物浦近5場作客冇入波
白禮頓現時排第15位，離降班區算係有段距離，所以今場對住紅軍無話要必勝，打和執1分球隊應該都好滿意。睇番白禮頓贏阿仙奴2比1場波，佢哋初段都係踢穩守求1分，只係落後之下焗住要攻搶分，點知反勝到兵工廠。今場對住利物浦，「海鷗」更有自知之明，唔會同冠軍球隊硬撼。

利物浦亦唔好得去邊，復賽後表現有番昔日嘅「海鮮味」，尤其2場作客更只得1和1負，連停擺前，紅軍近5仗作客竟然未入過波，只得1和4負，真係嚇死人。

今場利物浦好大機會進行輪換，收起Keep住有少少傷嘅穆罕默德沙拿，改用南野拓實夥拍羅拔圖法明奴及沙迪奧文尼，鋒力驟減之下，讓球盤要讓一球有啲過火，寧捧白禮頓下盤好過。