今晚英超頭場爆歐洲賽入場券爭奪戰，排第9嘅錫菲聯主場迎戰第7嘅熱刺。聯賽得番7輪，兩軍面對快車賽程都冇得保留，錫菲聯主場勝在穩定，近7場聯賽主場獲4勝2和；熱刺上仗回勇贏波，加上隊長哈利卡尼重拾射門鞋，捧2.5球入球大。（Now 621周五凌晨1時直播）

「哈神」重拾射門鞋
熱刺今季表現下滑，同哈利卡尼因傷長抖當然有關，不過「哈神」傷愈復出後，上場2比0輕取韋斯咸一役終於入番波，另一王牌孫興民亦表現生猛，由此可見領隊摩連奴手上兵源充足，作客照當主場咁踢。

錫菲聯復賽後3場聯賽均要作客，贏唔到屬非戰之罪，今晚主場出擊可望重現威力。佢哋近7場聯賽主場獲4勝2和1負，首循環作客熱刺亦打和1比1成功搶分，主場應戰相信更放膽進攻，容易出現入球騷。