上世紀70至80年代雄霸英倫嘅利物浦，隨住曼聯同阿仙奴崛起、車路士及曼城嘅金錢足球橫行，令佢哋自1990年後喪失英倫霸者地位。「紅軍」事隔30年終於再稱霸英格蘭，之前嘅專欄已講過佢哋奪冠過程，在此恭喜佢哋。

永不放棄先有望重拾光輝
至於我兩隊至愛，洛杉磯湖人已經10年未嘗總冠軍滋味，另一隊洛杉磯道奇自從1988年以二三線球員奇迹奪冠後，32年來亦未再稱霸ＭＬＢ，尤其係2017年輸畀休斯敦太空人，直至今年對手被發現利用科技手法，竊取道奇投球手嘅暗號而得益，雖然太空人被重罰，但道奇都無法搶番冠軍，粉絲惟有吞咗呢啖冤屈氣，期望道奇好似利物浦咁永不放棄，先有希望重奪錦標。