．擺鐵桶陣搶分．

今晚英超「倫敦打吡」，力求護級嘅韋斯咸主場鬥車路士。貴為今季「倫敦打吡王」，車仔照計對住邊支同市球隊都唔怕，但偏偏對住韋斯咸就老鼠拉龜，近5次交手全部總入球開2球或以下，而且車仔只獲1勝2和2負，今場作客點都有啲戒心，唔會亂嚟，客勝有風險，寧捧中位數2.5球入球細。

（Now 621周四凌晨3時15分直播）

車路士復賽後連場大戰，雖然先後於聯賽擊敗維拉及曼城，再喺英足盃淘汰李斯特城，但值得留意嘅係，佢哋全部僅以1球取勝，體力上已有不及，踢起嚟亦就住就住，始終復賽之後賽事頻頻，球隊上下要懂得留放。

近5次交手全開細
車仔乃今季「倫敦打吡王」，7戰同市球隊獲5勝1和1負，入12球失6球，相反韋斯咸今季「倫敦打吡」戰績，只得2勝6負，得9球失14球，不過2場勝仗當中，偏偏就包括去年11月尾作客史丹福橋，以1比0擊敗車仔，吸取過教訓，相信車路士今仗不敢過分冒進，肯定會步步為營。

韋斯咸聯賽重開後連輸2場，仍然喺護級漩渦中掙扎，面對同市強隊必定大踢穩守突擊戰術，幸好對住車仔往績唔輸蝕，近5次交手有3次可以保持不失，呢5場總入球均少於3球，相信韋斯咸會照辦煮碗，擺鐵桶陣迎接車仔，捧中位數2.5球入球細啱數。