復賽後未回魂
今晚續演西甲快車，當中伊巴主場迎戰華倫西亞，兩隊喺聯賽重開後表現欠佳，伊巴踢3場未開齋，華倫西亞近3場亦只曾1勝，睇嚟仲未回魂。加上近4次聯賽交鋒，總入球都係2球或以下，預料悶戰居多，一於捧中位數2.5球嘅入球細。

（Now 632周五凌晨1時30分直播）

未計周四凌晨賽事，伊巴現時排聯賽尾4位置，仍然深受降班威脅，照計應該落力搶分護級。奈何球隊實力所限，想搶分亦有心無力。連同停擺前賽事在內，伊巴近5場西甲只取得2和3負，單計主場亦近3場不勝，今勻遇上前列球隊華倫西亞，莫講話贏，連想入波都會有困難。

華倫西亞作客冇火
另一邊廂，華倫西亞上場喺主場以2比0擊敗奧沙辛拿，終於打破連續3場聯賽不勝困局。不過佢哋作客成績差劣，近6場聯賽作客只有2和4負，夾埋不過入得3球，今場想贏亦唔容易。

事實上華倫西亞近5次作客伊巴，僅獲1勝2和2負，其中4次總入球係2球或以下，若計兩軍近4次聯賽碰頭，更全部開出細盤，有晒往績支持，今仗中位數2.5球嘅入球細，屬最佳選擇。